Atzealdea

Ongi etorriak Gipuzkoa Irekira!

Atzealdea

Ongi etorriak Gipuzkoa Irekira!

Data:
2015-02-06

GIPUZKOA IREKIA, erakundeen informazioa herritarren eskura jartzeko tresna.

Duela urtebete, 2014. urtearen hasieran, hasi ginen proiektu hau lantzen. Orduz geroztik, hainbat aldaketa eta birmoldaketa egin ditugu. Foru Aldundiaren ekimenez sortu den arren, gipuzkoar guztiontzako ataria izatea du helburu Gipuzkoa Irekiak. Gipuzkoa osoko erakundeentzako eta erakundeekin elkarlanean eraikitako ataria da, eta, horregatik, guztion erreferentea izatea da gure erronka.

Eskerrak eman nahi dizkiegu partaide diren erakunde guztiei. Alde batetik, foru erakunde publikoei (Uliazpi, Kabia, IZFE; Itten, Bidegi), eta baita Batzar Nagusiei ere, atari honetan jarri duten konfiantzagatik. Eta, bestetik, jadanik partaide diren udalei,  beren informazioa Gipuzkoa irekian zabaltzeagatik. Eta oraindik partaide ez diren udalak parte-hartzera animatu nahiko genituzke.

Gaur, Gardentasuna eta Datu irekiak ataletako edukiekin argitaratu da Gipuzkoa irekia, baina jakin ezazue etorkizunean Partaidetza atala ere bertan izango dugula, gobernu irekiaren filosofiaren arlo guztiak jorratzeko.

Gardentasuna atalean, kudeaketa publikoarekin lotutako informazioa argitaratuko dugu, herritarrentzako interesgarria eta erabilgarria izan daitekeela uste baitugu.

Horrez guztiaz gain, herritarrek informazio zehatzak eskatu eta jasotzeko duten eskubidea bermatzen dugu atari honetan.

Datu irekiak atalean, aldiz, administrazioak bere eguneroko jardunean erabiltzen dituen datu-multzo ugariak argitaratuko ditugu, herritarrek eskuragarri izan ditzaten. Datu horiek badute zenbait berezitasun: berrerabilgarriak dira, eta makinek automatikoki irakurtzeko modukoak dira gehienetan.

Atari honi esker, herritarren eskura jarri ditugu orain arte erakunde publikoek soilik erabiltzen zituzten datuak; horri esker, gizartearentzat baliogarriak izan daitezkeen aplikazio eta proiektu berrien garapena sustatu nahi dugu.

Horretaz gain, datu irekien eskaera egiteko aukera ere badago atal honetan. Hala ere, datu horiek eskatzen duten prestakuntza handia denez, maizenik eskatzen diren datuak soilik prestatu eta argitaratuko dira epe motzean. Gainerakoak, aldiz, epe luzerako garapenetan hartuko dira kontuan.

Eta, azkenik, aipatzekoa da Gipuzkoa irekia atariak guztiz "irekia" izatearen alde egin duen apustua, software librea (CKAN, Liferay, html5,,,) erabiliz, lizentzia irekiak (Creative Commons) oinarritzat hartuz eta, noski, datuak ahal den formatu irekienean argitaratuz.

Espero dugu zuen gustukoa izatea.