GARDENTASUNA

 

Zer arautzen dute gardentasunaren legeak eta foru arauak?

Legeak arautzen du tokiko administrazioek argitaratu eta herritarren esku jarri beharreko informazioa. Foru arauak, era zabalagoan, zehazten du zer informazio argitaratu behar duten Gipuzkoako Foru Aldundiak eta haren organoek, foru organismo autonomo eta foru enpresa-entitate publikoek, merkataritzako foru sozietate erakundeek, foru sektore publikoko fundazioek eta Gipuzkoako Batzar Nagusiek.

Zein erakundek bete behar dute legea?

Legea bete eta eskaerei erantzun behar diete arlo publikoko administrazio publiko guztiek, arlo publikoko fundazioek, administrazio publikoek osatutako erakundeek eta parterik handiena publikoa duten merkataritza elkarteek. Horiez gain, erakunde pribatu eta alderdi politikoek ere argitaratu beharko dute informazioa. Sindikatuek, erakunde sindikalek eta laguntzak jasotzen dituzten beste erakunde batzuek ere bai.

Zein erakundek bete behar dute foru araua?

Hauek dira foru araua bete behar dutenak: foru administrazioa (Foru Aldundia); administrazio instituzionala (foru organismo autonomo eta foru enpresa-entitate publikoak, azken horiek zuzenbide publikoari lotuta dihardutenean); merkataritzako foru sozietateak; foru sektore publikoko fundazioak (hau da, beren patronatuko kide gehienak sektore publiko horretako erakundeek izendatuak dituztenak eta, horrez gainera, honako ezaugarrietako bat daukatenak: hots, foru administrazioak edo foru sektore publikoko gainerako erakundeek, zuzenean nahiz zeharka, egindako ekarpen gehiengodunari esker eratuta egotea edo beren fundazio-ondarea, ehuneko berrogeita hamarretik gorako portzentaje batean, aipatu erakundeek emandako edo utzitako ondasunez edo eskubidez osatuta egotea modu iraunkorrean); Gipuzkoako Batzar Nagusiak, administrazio zuzenbidearen esparruko jardunari dagokionez.

Argitaratu beharreko informazioak mugarik ba al du?

Noski. Gerta daiteke informazioa ez argitaratzea edo bere osotasunean ez argitaratzea, datu pertsonalak babestearren. Datu pertsonalak dituen informazioa argitaratu ahal izateko, datuak bereizi egin dira, eta datu pertsonalak ezkutatu.

Nahi dudan informazioa ez badut aurkitzen atarian, zer egin dezaket?

Printzipioz, gardentasunaren legeak eta foru arauak (Gipuzkoako Foru Aldundiaren eta foru erakundeen kasuan) eskatutako informazio garrantzizkoena ageri da atarian. Oraindik falta den informazioa, pixkana eransten joango gara.

Informazio gehiago nahi izanez gero, informazio hori atarian bertan eska dezakezu, informazio publikoa eskatzeko dagoen formularioaren bidez.

Zer da publizitate aktiboa?

Erakunde publikoek beren kabuz eta doan argitaratu edo zabaldu behar dute legeak eta foru arauak zehaztutako informazio publikoa. Informazio hori gutxienekoa eta nahitaezkoa da, nahiz eta  publizitate zabalagoa eskatzen duten xedapen espezifikoak aplika daitezkeen edo subjektu behartuek, beraiek hala nahi izanda, informazio hori zabal dezaketen.

Zer da Informazio publikoa eskuratzeko eskubidea?

Pertsona guztiek baliatu ahal izango dute informazio publikoa eskuratzeko eskubidea. Eskubidea eta dagokion prozedura gauzatzean, prozedura barruan dela, oinarrizko araudiak ezarritakoa beteko da.

Edozein datu mota eska al dezaket?

Datu eskaerak baditu mugak batzuk, ondasun juridikoei babesa eman edota datu-pertsonalak babestu behar direnez. Publikoa ez den informazioa babesten dute muga horiek, pertsona edota interes publikoak ez daitezen kaltetuak izan.

DATU IREKIAK

Zergatik dira garrantzitsuak datu irekiak?

Gaur egungo gizartean, datuak oinarrizko baliabidea dira. Administrazio publikoak informazio ugari du zerbitzu publikoak aurrera ateratzeko. Administrazioaren datuak erabat erabilgarriak dira, eta are erabilgarriagoak izan daitezke herritarren esku jarri eta informazioa berrerabiliz gero.

Zer dira datu publikoak?

Edozein administrazio publikok (edota hirugarren batek, administrazioak hala eskaturik) erregistratu, bildu edo sortu dituen datuak dira datu publikoak. Pribatutasuna, jabetza, segurtasuna edo abenduaren 13ko 15/1999 Legea urratu dezaketen datuak kanpoan uzten dira. Baita prozedura administratibo batek araututa dituen datuak ere.

Zer dira metadatuak?

Datuak edo datu multzoak deskribatzen dituzten datuak dira metadatuak. Dokumentu bati edo errekurtsoei buruz informazioa emateko balio dute.

Zer egin daiteke datu horiekin?

Datu irekiak oinarritzat hartuta aplikazioak garatzea da ohikoena. Beste aukera bat zera da: datuak bistaratzeko era ezberdinak garatzea, analisi bat egin ahal izateko eta erabakiak hartzeko. Aukerak zabalak dira, herritarrek dauzkaten ideien adina zabalak.

Nola partekatu dezaket nire ideia?

Datuen erabilerarako ideia on bat duzula? Esan iezaguzu info@gipuzkoairekia.eus posta helbidearen bitartez.

Nola partekatu dezaket nire aplikazioa?

Gure datuak erabiliz aplikazio bat sortu al duzu? Formulario hau bete dezakezu, guri jakinarazteko.

Datuak jaisterakoan arazorik badut, zer egin dezaket?

Datuak jaisterakoan arazorik baduzu, gurekin harremanetan jar zaitezke, euskarria den e-posta helbidera idatziz (helbide hori datu multzo bakoitzaren metadatuetan ageri da).

Zein da datu multzoekiko erantzukizun eta bermea?

Gipuzkoa irekiak bere partaideen artxiboetan ageri diren bezala aurkezten ditu datu multzoak,  eta, nahiz eta saiatu datu-multzoak era egokian kudeatzen, ezin du ez ziurtatu datu-multzo horien zuzentasuna, eguneratzea edota etengabeko sarbidea, ezta bermerik eskaini ere zentzu honetan.

Gipuzkoa irekiko partaideek edozein unetan erantsi, ezabatu edo aldatu ditzakete argitaratutako datu-multzoak edota erabilera baldintza hauek. Aldaketen berri www.gipuzkoairekia.eus-en emango da. Egindako edozein aldaketa indarrean sartuko da aldaketa iragarri den une berean, kontrakorik adierazten ez bada.

Gipuzkoa irekiko partaideak ez dira datu irekien erabilerak ekar dezakeen inolako kalte ekonomiko edo materialen arduradun egingo.

Zein da erabiltzailearen ardura?

Erabiltzaileak azaroaren 16ko 37/2007 Legea bete behar du, sektore publikoaren informazioaren berrerabilerari buruzkoa (zigor erregimenari buruzko atala, batez ere). Baita informazioaren erabilerari buruzko araudia ere (datuen babesari buruzko 15/1999 Lege Organikoa), eta, orobat, apirilaren 12ko 1/1996 Legegintzako Errege Dekretua, jabetza intelektualari buruzko testu bategina onartzen duena.

Erabilera arau hauek ez direlako bete edota lizentziaren baldintzak ez direlako gorde, Gipuzkoa Irekiko edozein partaidek lege izapideak pairatuko balitu edota ekonomikoki zigortua izango balitz, erabiltzaileak erantzun beharko du haren aurrean, sortu daitekeen edozein gastu, zigor edo kalte-ordaini aurre eginez eta partaideak kaltetu gabe.

Nola jar zaiteke harremanetan Gipuzkoa Irekiarekin?

Eskatu nahi den informazio motaren arabera, kontaktu gune ezberdinak prestatu ditugu:

  • Ataria bera (www.gipuzkoairekia.eus) da informazio iturri osatuena. Albisteak eta azken txioak ere argitaratzen dira bertan.

  • Datu irekien multzo berri bat eskatu nahi izanez gero, Datu irekien eskaera ataleko datu ireki formularioa betez egin dezakezu eskaera.

  • Gardentasuneko informazio konkretu bat eskatu nahi izanez gero, Informazio publikoaren eskaera ataleko gardentasun formularioa betez egin dezakezu eskaera.

  • Bestelako informazioren bat nahi izanez gero, gurekin harremanetan jar zaitezke, ondorengo e-posta bitartez: info@gipuzkoairekia.eus.

  • Twitterren jarrai gaitzakezu. Hortxe zabalduko ditugu albiste berrienak.

  • Azkenik, datu multzo bakoitzak aukera ematen du iruzkinak idazteko.